CEBU, Philippines - Gipahimangnuan sa pangulo sa Talisay City Health Office ang katawhan nga dili magbuwad sa init sa adlaw aron makalikay sa mga sakit nga dala sa init sa panahon.
Si Dr. Lino Alanzado nibutyag nga karong panahona nga grabe ang kainit, dili kalikayan nga manggawas gyud ang mga sakit sama sa piskat, bungang singot, kagid-kagid ug uban pa.
Matud niya nga kun dili gyud kalikayan nga mobuwad sa init, magsul-ob og makaprotektar sa panit aron dili direktang maigo sa init.
Kay giingong ang kainit sa panahon sa ting-init, dili angay kumpyansaan kay maka-dehydrate kini mao nga importante sab nga magdala og tubig bisan asa.
Dugang ni Alanzado nga delikado sab ang heat stroke.
Tambag sab niya sa katawhan nga mangaligo og dagat o sa swimming pool, magbutang daan og sunblock. (BANAT NEWS)