Tungod sa kwentas, lalaki gipatay
CEBU, Philippines - Gipauwanan og mga bala ang usa ka trabahador sa lima ka mga armadong lalaki didto sa Sitio Camp 5, Barangay Manipis, Dakbayan sa Talisay niadtong Lunes sa buntag.
Ang biktima nailhan nga si Vitaliano Caburnay, 56, trabahante sa QM Builders.
Si SPO4 Cecilio Miñoza sa Talisay City Police Station nibutyag nga aduna’y silver nga kwintas ang biktima nga iyang giprenda.
Apan sa dihang nakita sa biktima ang lalaking nagmotorsiklo nga nagsul-ob sa iyang kwintas iya kining gigukod ug nakuha gyud niya ang iyang kwintas dayun balik sa lugar nga iyang gitrabahoan.
Way nasayod kun nganong gibuhat kadto sa biktima, apan paglabay sa pipila ka oras nibalik ang lalaki nga gikuhaan niya sa iyang kwentas kauban ang upat ka mga lalaki nga pulos armado.
Diha-diha gipauwanan siya og bala ug gibiyaan. Ang mga kapulisan nakarekober ug siyam ka kabhang sa .9mm, usa sa .45, usa ka cylinder sa revolver ug ejector rod diha sa crime scene.
Patay na kini pag-abot sa Talisay City District Hospital.
Asoy pa ni Miñoza nga aduna’y mga nakakita sa hitabo apan dili pa lang gyud mokooperar ang mga tawo sa lugar. (BANAT NEWS)
- Latest
