CEBU, Philippines - Gipasakaan na og mga kaso ang duha ka tawo nga gipasanginlang nanglugos sa managlahing hitabo sa Dakbayan sa Toledo.
Gipasanginlang miamong-among sa duha ka higayon ang 33 anyos nga amahan sa iyang 12 anyos nga anak sa ilang pinuy-anan sa Brgy. Ibabao. Giingong gisulod sa suspek ang iyang tudlo ngadto sa kinatawo sa iyang anak.
Matud ni SPO3 Liza Makidatu sa Toledo City Police Station nga ang inahan mismo ang miuban sa iyang anak kini human misumbong ang dalagita nga gibinuangan siya sa iyang amahan. Dali sab nga nasikop ang suspek kinsa giingong tiggamitan og ilegal nga drugas.
Samtang gibalhog sab sa prisohan ang 24 anyos nga lalaki human giingong milugos sa 19 anyos nga dalaga. Base sa imbestigasyon, giatngan niini ang dalaga dihang paingon na kining mopauli sa ilang panimalay sa Brgy. Tubod. Gibira niini ang biktima paingon sa kalibunan ug didto gipahimuslan ang dalaga.
Daling misumbong ang biktima sa kapolisan hinungdan nga nadakpan dayon ang suspek.
Sa Dakbayan sa Lapu-Lapu, samaran ang 65-anyos nga retiradong seaman human kini tigbasa sa iyang anak niadtong Lunes sa buntag sa Brgy. Looc.
Ang biktima mao si Ramon Rondario Sr. samtang ang nagtigbas kaniya ang iyang junior.
Asoy sa biktima nga pag-abot niya sa ilang balay, iyang nakit-an ang iyang anak nga nagbitbit og sundang ug miatake kaniya.
Matud ni SPO1 Lydo Pinos, usa ka drug dependent ang suspek ug kaduha na nagpa-rehab. Ang wala pagkasinabtanay sa duha maoy hinungdan sa hitabo.
Nakaangkon og 2 ka samad tinigbasan sa ulo ug sa ubang parte sa lawas ang biktima samtang gipangita pa sa kapolisan ang suspek. Raymond D. Abarcas ug Hazel Secop (BANAT NEWS)