CEBU, Philippines - Gibuksan na ang usa ka semana nga kalihukan sa Kadaugan sa Mactan niadtong Lunes pinaagi sa Food Festival nga gisalmutan sa lainlaing 5-star hotels sa Dakbayan sa Lapu-Lapu sa may Lapu-Lapu Shrine sa Barangay Mactan.
Tuyo niini nga ang mga ordinaryong tawo mahatagan sab og kahigayunan sa pagpatilaw sa mga pagkaon nga sagad lang mapalit sa mga dagkong hotels.
Si Konsehal Harry Radaza nga maoy acting vice mayor sa dakbayan maoy nangulo sa kalihukan.
Ang Kadaugan sa Mactan nga kaniadto gitawag og Bahug-Bahug sa Mactan nga mahitabo sa Abril 27 sa matag tuig maoy paghinumdum sa duguong panghitabo sa Barangay Mactan diin ang pundok sa mga lumad nga gipangulohan ni Datu Lapu-Lapu ang nakig-gubat sa grupo sa mga langyaw nga si Ferdinand Magellan.
Ang reenactment nakakabig og pagtagad dili lang sa mga lokal nga dumuduong sa dakbayan kun dili lakip na sab sa mga langyaw nga mga turista nga mobisita sa dakbayan. (BANAT NEWS)