Barkong napagngan, nakadunggo na
CEBU, Philippines - Nakadunggo na ang M/V Trans-Asia 2 sa pantalan sa Ozamis alas 9:50 sa buntag kagahapong adlawa human kini nag-utaw-utaw sa kadagatan sa maong dapit.
Matud ni Anecito Tero, ang deputy station commander sa Coast Guard Station Ozamis nga ang maong barko, nga adunay 619 ka pasahero, napagngan og makina hinungdan nga wala kini milahutay sa biyahe paingon dinhi sa Cebu.
Ang barko nigikan sa Ozamis alas 8 sa gabii niadtong Domingo ug modunggo unta sa Cebu pagka alas 7 sa buntag kagahapon.
Dugang ni Tero, nakadawat sila og report alas 6:30 kagahapon sa buntag nga mibalik sa Ozamis port ang maong barko hinungdan nga ila kining giluwas.
“Napulupot sa payaw ang usa sa ilang makina mao to ni overheat. Unya pagbalik nila sa Ozamis port, napalong pud ang usa ka makina,” matud pa ni Tero.
Ang mga pasahero, matud pa ni Tero, gipakaon ra usab sa mga tripulante sa wala pa kini midunggo sa pantalan. Luwas sab silang tanan ingon man ang 58 ka crew sa barko. (BANAT NEWS)
- Latest
