CEBU, Philippines - Gilaraw karon sa kagamhanan sa Dakbayan sa Mandaue nga ipahimutang sa laing relocation site sa maong dakbayan ug sa Siyudad sa Lapu-Lapu ang 288 ka pamilya nga biktima sa sunog sa Barangay Guizo ug Mantuyong.
Ang maong lakang nunot sa hingpit nga pagpahimutang sa 369 ka pamilya nga biktima sab sa sunog ngadto sa mga luna nga gigahin alang kanila human sa raffle nga gipahigayon.
Ang maong mga biktima kabahin sa 657 nga pamilya kinsa kasamtangang gipapuyo sa compound sa Cebu International Convention Center.
Nasayran nga nagsugod na og balhin niadtong Biyernes gikan sa maong lugar ang mga nasunugan ngadto sa naangkon na nilang luna nga gitagana sa kagamhanan.
Diin nagbaton na lang sila og tag 28 metro kuwadrado nga gidak-on sa luna ug naglumbay na ug gitaliwad-an og dagku nga dalan human sa reblocking.
Nunot sa pagpamalik sa mga nasunugan, hugot nga gi-monitor sa buhatan sa Housing and Urban Development Office ug ingon man sa Mandaue City Engineering Office. Kini sa pagsiguro nga hapsay ang ilang pagpahiluna sa ilang mga luna nga gidonar ngadto kanila sa kagamhanan sa dakbayan. - /DILT) (BANAT NEWS)