CEBU, Philippines - Bisan sa ilang kasagmuyo nga giwagtang na ang ilang overtime pay ug duha na ka buwan nga wala sila swelduhi, ang mga kawani sa Bureau of Immigration sa Sugbo nagpabilin nga nagtrabaho.
"Pait kaayo among kahimtang karon diri kay Pebrero ug Marso wala mi nakadawat sa among sweldo.
Unya wa na sad mi gihatagan sa among overtime pag Enero pa," matud sa tinubdan nga dili magpahingan.
Matud pa sa tinubdan nga daghan na sa ilang mga empleyado labi na sa mga batan-on nga nagplano na nga mo-resign sa trabaho tungod sa maong panghitabo.
"Bisan pa sa kapait sa among sitwasyon karon, di mi pwede mag-strike kay unsaon na lang kami baya ang frontliners. Kung mag-strike ming tanan, segurado dako kaayo ning problema kay kung pananglitan naay foreigner nga mo-renew sa ilang visa unya wa mi, makabayad sila sa penalty," matud niya.
Mando ni Presidente Rodrigo Duterte nga ang overtime pay sa mga kawani sa BI tibuok Pilipinas ang ibutang sa general fund ug mohangyo lang sila sa ilang overtime pay.
Apan matud sa tinubdan nga ang overtime pay gibayad sa mga shipping ug airline companies ngadto sa mga kawani sa BI nga nitrabaho lapas sa oras kay may mga flights nga kadlawon na mangabot.
Daghan nang mga BI employees sa kauluhan ang nangundang na sa trabaho ug aduna nay sobra sa 3,000 ang nang-leave tungod sa maong panghitabo. (BANAT NEWS)