CEBU, Philippines - Patay na nga naabot sa tambalanan ang 45-anyos nga maestro human naghikog sulod sa iyang balay sa usa ka subdivision sa Barangay 8, Lungsod sa Tuburan ug nadiskubrehan pasado alas 8 sa nakalabay nga buntag.
Giila ang maestro nga si Oliver Enjambre, ulitawo, nagtudlo sa Cebu Technological University (CTU) Tuburan Campus.
Sa pagsubay sa mga polis ilang nasayran nga dunay balatian ang maestro ug gani gitambagan na kini nga mokonsulta sa doktor.
Samtang sa Lungsod sa Santa Fe, patay na sab nga nadiskubrehan sa iyang inahan ug bayaw si Chelo Aniana Batolbatol, 32, minyo, human naghikog sulod sa iyang balay diha sa Barangay Maricaban pasado alas 9 niadtong nakalabay nga buntag. Duha ka semana na nga nabantayan nga nakaangkon og nervous breakdown si Batolbatol gumikan sa depresyon.
Walay nakita nga foul play ang kapolisan sa duha ka insidente. (BANAT NEWS)