CEBU, Philippines - Nagpabiling normal ang operasyon sa Department of Interior and Local Government (DILG-7) bisan pa man sa pagpalagpot sa ilang kalihim.
“A cabinet position is a position of trust and confidence. Secretaries serve at the pleasure of the President". Mao kini ang panahom ni DILG-7 regional director Rene Burdeos human gitaktak ni Presidente Rodrigo Duterte si DILG Secretary Ismael Sueno human sa ilang ika-14 cabinet meeting niadtong Abril 3 sa gabii.
Matud ni Presidential spokesperson Ernesto Abella nga gitaktak si Sueno kay wala nay "trust and confidence" ang presidente kaniya. Ug ang pagkataktak niini, nagsilbing warning sa ubang opisyales sa gobiyerno nga seryoso ang presidente sa iyang tinguha nga mabalik ang pagsalig sa katawhan sa gobiyerno.
Kahinumduman nga 92 ka opisyales sa gobiyerno ang gitaktak ni Duterte niadtong miaging buwan tungod sa isyu sa kurapsiyon.
Samtang matud ni DILG provincial director Jerome Gonzales nahan-ay na daan ang ilang mga programa alang sa tibuok tuig mao nga dili maapektuhan ang ilang operasyon kun aduna may bag-ong ibutang sa ilang buhatan ug moimplementar og bag-ong mga programa. Hinoon i-integrate lang nila sa ilang kasamtangang programa. Dugang ni Gonzales nga iyang nakita nga sinsero si Sueno sa iyang trabaho ug adunay integridad. Magpaabot na lang sila kun kinsa ang ihulip niini.
Si Cebu City Mayor Tomas Osmeña, naguol ug wala makatuo sa nahitabo kang Sueno kay maayo kini’g reputasyon ug wala siya makadungog og bisan unsa nga gikalambigitan niining kurapsiyon.
Si Sueno giakusahan og kurapsiyon sa tulo ka DILG Undersecretaries nga sila si John Castriciones, Jesus Hinlo ug Emilie Padilla. Ang maong pasangil daan nang gihimakak sa gitaktak nga kalihim. Mitchelle L. Palaubsanon, Le Phyllis F. Antojado ug Decemay P. Padilla (BANAT NEWS)