CEBU, Philippines - Ang mga sakop sa Cebu City Council magbinisaya sa pagsulti kun magpahigayon sila og off-site session sa lainlaing kabarangayan sa dakbayan aron masabtan pag-ayo ang ilang gipanulti sa mga manambong.
Samtang giuyonan usab sa City Council ang resolusyon ni Konsehal Pastor Alcover Jr. nga ang mga sakop sa konseho magsul-ob lang og ordinaryo nga mga sapot sa ilang mga session sa barangay. Gikauyonan sab sa konseho nga gipangulohan ni Vice Mayor Edgardo Labella nga matag karon ug unya, mogawas sila sa City Hall ug adto mag-session sa barangay.
Matud ni Alcover nga nindot kaayo ang pagpahigayon og off-site session aron sayon ra nga makatambong ang katawhan ug tukma lang nga magbinisaya sila sa ilang pagsulti aron masabtan pag-ayo sa mga tawo.
Kun sa session hall magsul-ob gyud og Amerikana ug Barong Tagalog ang mga sakop sa konseho, nauyonan nila nga ordinaryo ra nga sapot ang ilang isul-ob sa off-site session.
Ang mga motambong sa off-site session wala usab kinahanglana nga magsul-ob og nindot nga sapot, apan kinahanglan nga dili sab bulingon.
Kun ang session sa mga konsehal adto himoa sa kabarangayan, dili nila ipatuman ang estrikto nga mga lagda, sama sa pagdili nga adunay magkaon samtang maminaw sa session ug ilabi na kadtong matulog ra sa lingkoranan. - /DILT) (BANAT NEWS)