821 ni-gradwar sa rehab program

CEBU, Philippines - Nikabat sa 821 ka kanhi drug users sa 27 ka barangay sa Lungsod sa San Remigio ang nigradwar sa tulo ka buwan nga community-based treatment kagahapon.

Kini gipasiugdahan sa lokal nga kagamhanan, kapolisan, non-government organizations, mga barangay ug Department of Health. Ang maong mga graduates maoy una sa tibuok Rehiyon-7 nga nakakompleto sa programa nga gipahigayon sa DOH-7.

Matud ni Bertel Aballe sa Municipal Anti-Drug Abuse Council ug community-based consultant nga aduna silay 1, 441 ka drug surrenderers apan 821 lang niini ang nagpa-enroll sa programa nga gisugdan niadtong Oktubre.

Sumala pa ni Aballe nga sa 821 nga nakahuman, 406 ang nakapasar sa gipahigayon nga pakisusi sa DOH ug mahatagan sila og certificate nga makapadayon sa ilang pagpaubos sa training sa Technical Education and Skills Development Authority,

Kadtong wala pa mahatagi og certificates kinahanglang makapasar sa guidelines sa DOH alang sa phase 2.

Si Dr. Juan Zaldarniaga Jr., chief of hospital sa Cebu City Treatment and Rehabilitation Center, nitug-an nga ang DOH maoy mohatag og certificates aron makapadayon ang mga reformers sa ilang skills development ug livelihood program sa mga ahensya nga ilang kauban.

Si Dr. Dino Caing, sa DOH-7, nibutyag nga ang gihimo sa San Remigio usa ka maayong panag-ingnan sa ubang lokal nga kagamhanan nga dili kinahanglan ang dakong budget aron makahimo sa pagtabang sa mga drug surrenderers.

Sumala pa ni Dino nga wala silay gihatag nga budget ug igo lang silang nagsuporta.

Si San Remigio Mayor Mariano Martinez nibutyag nga mapasalamaton siya sa tanan mga niabag kanila samtang dili mominus sa P100,000 lang ang iyang gasto sa unang hugna sa maong programa. (BANAT NEWS)