Lamiang timpla sa gugma sa kalampusan

CEBU, Philippines - Gugma sa negosyo ug kakugi ang nagpahipi nga sa kalampusan sa nabantog na nga Mom’s Pizza dinhi sa Sugbo.  Ug luyo niining maong kalamposan usab ang sugilanon sa kalisud sa pagkinabuhi kaniadto sa magtiayong Linda ug Ricardo Alvarico nga maoy nanag-iya niining maong negosyo.

Ang 72-anyos nga si Ricardo nagdako nga daling masakit hinungdan nga dili siya makalahutay og panarbaho. Pagtapos niya sa kolehiyo, nibukas siya og buy & sell business og mga kinhason sanglit kasaragan sa iyang mga higala mananagat. Dili sila adunahan ni Ricardo. Ang iyang  mga ginikanan nangimpleyo sa negosyo sa iyang apohan diin ang iyang amahan tighatod og tubig sa barko, samtang iyang inahan sab maoy sinaligan sa buluhaton sa balay. Kamaguwangan siya sa lima ka managsuon.

Niadtong high school na siya, dihay panahon nga niundang siya pagtungha ug nag-taxi driver. Nakatapos siya og kursong BS-Industrial Engineering sa University of San Jose Recoletos  pinaagi sa veteran’s scholarship sa iyang amahan.  Kanhi guerrilla ang iyang papa nga karon nagpangidaron na og 97 anyos.

Kun lisud ang kahimtang nila ni Ricardo kaniadto, mas labaw ang sitwasyon sa iyang asawa nga si Linda. Ikatulo si Linda sa siyam ka managsuon. Pamanday ang panginabuhian sa iyang amahan ug ang iyang inahan maoy nag-atiman sa ilang panimalay. Lisud ilang kinabuhi niya pa sanglit dili man kanunay nga adunay trabaho ang iyang amahan.

Hinungdan nga dihang nag-edad na siya og 15-anyos nanginabuhi na siya aron makatabang sa ilang kahimtang.

“Sa mga gagmay pa mi, mangita pa mi og katrabahoan. Ako, nakasuway ko’g pa-maid, bantay og bata, labada hangtod naka-graduate ko sa high school.” Paambit pa niya.

Unya nakatrabaho si Linda sa usa ka restaurant nga nahimutang duol sa tunghaan ni Ricardo. Customer si Ricardo sa maong restaurant usa niini ka higayon ug matud pa gibati og gugma sa una pa lamang niyang pagkakita sa iyang asawa. Duha una sila ka tuig nga manag-uyab, una nihukom nga magminyo. Baynte siete anyos si Ricardo ug 22 usab si Linda dihang gikasal sila.

Paghimugso sa Mom’s Pizza

Shell craft gyud ang unang negosyo sa magtiayon. Apan gihunong nila kini dihang nihinay ang maong negosyo. Dinhi na namugna ang Mom’s Pizza nga ilang gibuksan niadtong 1988. Kini ang ilang gipili nga matang sa negosyo sanglit ang mga igsuon ni Linda una nang nagbaligya og ingon niini didto sa Cagayan de Oro. Daling nailhan ang ilang produkto gumikan kay isuroy man kini sa ilang mga tindera ngadto sa nagkadaiyang mga tunghaan.

“Ideya gyud ni Linda-- iyang gieskwelahan, nikuha siya og baking pizza nga course,”  butyag pa ni Ricardo.

Sa pagsugod nila, mag-apod-apod sila og libre nga pizza ngadto sa ilang mga kaila hangtud nga dihang daghan na ang nakatilaw ug gilamian niini, nakahukom sila nga pormal na gayud nga magbukas og negosyo niini. Namaligya sila sa nagkadaiyang tunghaan ug mga tindahan. Suma pa nga sa sinugdanan, 20 boxes lamang ang ilang delivery ug gumikan sa ilang paningkamot pinaagi sa pagpalami pa sa ilang produkto, nilambo gyud ang ilang negosyo. Paglabay sa usa ka dekada o niadtong 2008, giisip nila nga mao kini ang labing malampuson gayud nga panahon sa ilang negosyo.

Apan nihinay ang mao nilang negosyo sa pagdagsa na sa mga inilang kompaniya sa donuts dinhi sa Sugbo ug pagbukas usab sa mga dagkong malls.

“Sauna ang among kompetensiya kay saging ra. Karon nga daghan kaayo og kompetensiya, anha ra gyud me nagsalig sa Ginoo,”angkon pa ni Linda.

Busa ang ilang diskarte mao ang pagpamaligya ngadto sa nagkadaiyang kalungsoran.

“Ang atong effort nga maka-sustain ta--kun pananglitan hinay, kamao sab ta mo-adjust. Kay kaning pizza mabahaw man ni, maong 15-30 na gani amo nang patas-an ang production ‘nya kun liwas kay amo sab na paubsan, maong dili me mabahawan,” butyag pa ni Ricardo.

Si Linda sa iyang bahin, niangkon nga dili lalim ang pagdumala og maong negosyo. Mamuhonan gayud matud pa ka og igong kakugi.

“Kinahanglan nga ikaw mag-una sa imong mga tawo. Four o’clock sa kadlawon kay mata naka para makakita imong mga tawo nga nagtrabaho naka para mosunod sab sila,”niya pa.

Malampuson gayud ang mao nilang negosyo. Gani, pinaagi niini nakalampos ang ilang tulo ka mga anak og kolehiyo. Ang kamagwangan nakahuman og BS-Nursing, BS-Management ang ikaduha ug Associate in Computer Technology ang kamanghuran.

Karon, plano sa magtiayon nga sudlan usab ang pagpa-franchise sa mao nilang negosyo.

Relasyon sa Ginoo

Dungan sa kalampusan nga natagamtam, mas nalig-on usab ang ilang relasyon sa Ginoo. Gani, si Ricardo nag-alagad sa simbahan isip lay minister sulod na sa unom ka tuig.

“We know nga kining among business kay piniyalan ra gyud mi sa Ginoo, kun wala ang guide sa Ginoo namo, mawala nani sa kadaghan nga pizza nga nanggawas karon”, ni Linda pa.

Giangkon ni Linda nga niadtong tuig 2000 niya hingpit nga nadawat sa iyang kinabuhi si Kristo ug dili na lang kay negosyo ang iyang gipalambo, lakip na ang  ang relasyon niya ngadto sa Ginoo.  Agi og bawos sa mga grasya nga nadawat  bukas ang ilang mga kasingkasing  pagtabang sa uban.

“Ang command sa Ginoo kay 10% ang tithing, kami we give more,”niya pa. Alang nila, ang rason nganong hangtud karon kinaham gihapon ang Mom’s Pizza mao nga nagpabilin gayud ang lami nga timpla niini sukad kaniadto hangtud karon.

Karon, tambag sa magtiayon ngadto sa buot magnegosyo mao nga kinahanglan nga suhito ka sa imong sudlan ug angayan nga imo kining ipasigarbo. “Love your business, dapat proud ka sa imong business, niya ang imohang kakugi, mao ra gyud na ang sekreto,” panapos pa nila.