CEBU, Philippines - Bisan og ang Team Rama naibanan og usa ka sakop diha nga si Konsehal Jerry Guardo mitapon na sa Bando Osmeña Pundok Kauswagan, apan ang kanhi mayor nga si Michael Rama nangangkon nga lig-on gihapon ang ilang grupo.
Gani, si Konsehal James Cuenco nga maoy majority floor leader sa City Council, nangangkon nga ang Team Rama pa gihapon maoy maisip nga majority diha sa konseho kay bisan og milukso na si Guardo sa BOPK, walo pa sila nga Team Rama ug pito ang BOPK.
Gidasonan ni Rama ang argumento ni Cuenco nga sila si Konsehal Dave Tumulak ug Nendel Hanz Abella dili mahimong apilon pag-ihap nga sakop sa BOPK tungod kay nangangkon ang duha ka konsehal nga sila mga independente.
Tungod niini, gihagit ni Cuenco sila si Konsehal Tumulak ug Abella nga magpaila na sila kun sakop ba gyud sila sa BOPK aron makapangangkon na kini nga maoy majority diha sa City Council.
Ang mga konsehal nga sakop sa majority diha sa konseho maoy matugyanan sa pagka tsirman sa mga komitiba, ilabi na kadtong giisip nga gamhanang komitiba sama sa Committee on Budget and Finance; Education; Laws and Good Government; Health and Hospital Services ug uban pa. Hinuon si Rama miingon nga bisan pa og dili ang Team Rama maoy majority diha sa City Council, makahimo gihapon sila sa pagpasaka og kaso didto sa hukmanan kun may makita sila nga kwestiyonable nga kalihukan sa administrasyon nga gipaboran lang sa konseho.
Matud ni Rama nga nalipay lang gihapon siya nga mentras sayo pa iyang nasayran nga si Guardo dili gyud loyal sa ilang grupo.
Si Guardo nakahukom nga biyaan ang Team Rama tungod kay wala kini makabadlong sa kauban ra nila sa grupo nga maoy mipasaka kaniya og kaso tungod sa kapakyas pagsumiter og financial report diha nga siya kapitan pa sa Brgy. Sambag 1. Ang kanhi mayor wala na ganahi nga modugang pa sa isyu kay matud niya dili niya kahinugnan si Guardo nga lugak og baruganan ug pagtamod sa mithi sa ilang grupo. - /EIM) (BANAT NEWS)