Plano alang sa Compania Maritima gisugdan na

CEBU, Philippines - Gitrabaho na sa kagamhanan sa Siyudad sa Sugbo ang plano nga himoong Aviary ug Walk In Park ang Compania Maritima nga dugay na nga giplano ni Mayor Tomas Osmeña.

Si Osmeña mohimo og formal proposal aron i-lease ang lugar alang sa maong proyekto.

Nakig-alayon ang kagamhanan sa siyudad sa Cebu Port Authority alang sa maong plano sanglit ang Compania Maritima iya man sa CPA.

Sa administrasyon kaniadto ni kanhi mayor Michael Rama giangkon niini ang pagpanag-iya sa Compania Maritima kay matud pa ubos kini sa hurisdiksiyon sa siyudad ug gani may kaso niini sa korte.

Apan si Osmeña niingon nga ang korte niasoy   nganong dili man mosulod og settlement ang siyudad ug CPA sa maong problema.

Dunay sugyot si Osmeña ug kini ang pagkuha og investor nga andam mobubo og puhunan nga makatabang sa mga Sugbuanon ug magtunga lang ang siyudad ug CPA sa kita.

Tukion una sa CPA Board kung uyon sila sa iyang tinguha nga himoong Aviary ug Walk In Park ang lugar.

Gani gipakita ni Osmeña sa iyang Facebook ang hitsura sa Compania Maritima kung mahinayon ang iyang plano.

Nakitang investor ni Osmeña si Chris Ang kinsa daghang binuhi nga langgam nga naa karon sa Barangay Busay. Matud ni Osmeña nga kung mahinayon ang plano makatabang gyud kini sa turismo sa siyudad.

Ang siyudad dili mogasto sa maong proyekto sanglit abagahon man kini sa investor. (BANAT NEWS)