CEBU, Philippines - Andam na ang kapolisan sa Siyudad sa Talisay alang sa ika-72 ka tuig nga paghandum sa kagawasan gikan sa mga langyaw karong Domingo.
Si Supt. Emerson Dante, hepe sa kapolisan sa dakbayan, nagkanayon nga iya na nga gipahibawo ang tanan niyang sakop sa ilang tagsa-tagsa ka trabaho ingon man ang mga augmentation forces sama sa military, force multiplier ug mga barangay tanod.
Gilauman nga daghan ang mga tawo nga modagsa sa kadagatan aron mosaksi sa pagsaulog sa “Takas sa Talisay”.
Sugdan ang programa pinaagi sa Santos nga Misa sa alas 6 sa buntag dayon ang hamubo nga programa uban sa mga dinapit nga mga opisyal gikan sa nasud sa Amerika ug Japan.
Masaksihan sa katawhan ang re-enactment sa gubat kaniadto pinaagi sa mga tinun-an sa Talisay City College (TCC).
Hangtud pa sa gabii ang ubang kalihukan maong giawhag ni Dante ang katawhan nga dili mokompiyansa tungod kay mao kini ang paborito sa mga kiriwan og kamot. (BANAT NEWS)