Sakop sa Team Rama nag-unay?
CEBU, Philippines - Daghan ang naintriga sa Facebook post ni suspended Cebu City Councilor Jerry Guardo kinsa miingon nga sakit pamalandungon nga ang hinungdan sa iyang pagkasuspenso tungod ra usab sa iyang kauban sa partido.
Kahinumduman nga gisuspenso sa DILG og 3 ka buwan ang konsehal gumikan sa iyang kasong simple neglect of duty dihang kapitan pa kini sa Brgy. Sambag 1.
Giangkon ni Guardo nga nasakitan siya kay kauban ra niya sa partido ang hinungdan nganong siya nasuspenso. Iyang gipasabot sa maong post si Sambag 1 Barangay Captain Lemar Alcover, anak ni Konsehal Pastor Alcover nga kauban niya sa Team Rama.
Gihulagway sa konsehal nga dili maayo tan-awon nga pareho ra og partido apan nag-unay. Maghatag kini og bating mensahe mao nga angay kining resolbahon sa party leaders.
Napaabot na ni Guardo ang hitabo kang kanhi mayor Michael Rama, ang lider sa Team Rama ug kang Vice Mayor Edgardo Labella.
Gianugnan kini sa nahitabo kaniya kay importante matud pa ang iyang boto sa konseho ug dili siya buot nga ma-outnumbered ang iyang partido.
Hinoon, bisan pa sa nahitabo, walay plano si Guardo nga motapon sa kaatbang nila nga partido kini taliwala sa mga huhungihong nga nanggawas. Alang niya, ang gusto niyang mahitabo nga masulbad ang kasungian.
Gisigundahan ni Vice Mayor Labella ang pamahayag ni Guardo nga angay gyud resolbahon ang problema apan kini mitataw nga ang nahitabo, ang nahimong reklamante mao ang field investigation sa Office of the Ombudsman ug dili si Kapitan Alcover. Dugang niini nga dili ra makaapekto sa ilang partido ang nahitabo ug matud pa si Rama maoy makig-istorya sa mga hingtungdan. (BANAT NEWS)
- Latest
