Pawnshop gitulis

CEBU, Philippines - Mokabat sa kapin P400 mil nga salapi ang nalimas sa duha ka tulisan nga mitulis sa usa ka pawnshop diha sa Brgy Lahug ning Dakbayan sa Sugbo ala una pasado kagahapon sa hapon.

Ang hepe sa Mabolo Police, Sr. Insp. Jacinto Mandal nga nahinabi sa Banat News miingon nga duha ka mga lalaki ang mitulis sa Super R Pawnshop. Ilang nasayran nga walay guwardiya, walay close circuit television (CCTV), walay security alarm system ug nag-inusara ra ang tawo sa maong pawnshop nga mao ang teller nga si Jinky Garciano.

Si Garciano nga nahinabi sa mga tigbalita miingon usa ka lalaki ang nisulod nga abi niya og kostumer apan nideklarar og tulis ug laing lalaki usab nga nag-jacket ug nag-bonnet ang migapos kaniya gamit ang tape ug mipaabli sa vault.

Sumala pa sa kahera ngadto sa mga polis, gikuha usab sa mga tulisan ang mga alahas, ang mga giprendang gadgets ug iyang duha ka selpon.

Apan ang hepe sa Mabolo Police gusto nga palawman ang imbestigasyon kay base sa ilang pagsubay, ang cash ra ug duha ka cellphones sa kahera ang gidala sa mga tulisan.

Ang mga silingan nga mga establisemento nga nahinabi sa Banat News miingon nga wala sila nakabantay nga gitulis ang pawnshop kay nahibalo na lang sila pag-abot na sa mga polis. Apan ang mga habal-habal sa maong dapit nakabantay nga adunay duha ka lalaking nanulod sa maong pawnshop apan nagtuo lang sila nga mga kostumer kadto. - /EIM) (BANAT NEWS)