CEBU, Philippines - Ang pangulo sa General Services Office (GSO) sa Cebu City Hall nitataw nga wala gyud sila’y dokumento nga magpakita nga adunay Dodge Charger nga sakyanan nga gidonar ang Bigfoot Entertainment ngadto sa siyudad.
Matud ni Ronald Malacora nga human nitumaw pagbalik ang isyu tungod sa pagpasaka og kaso ni Apas Barangay Kapitan Ramil Ayuman sa Malacañang batok ni Mayor Tomas Osmeña, iya dayong gipasusi ang mga rekord sa property section.
Gipasanginlan ni Ayuman si Osmeña nga nidala sa duha ka Dodge Charger nga sakyanan nga gidonar sa Bigfoot Entertainment usa ka tuig sa wala pa mapupos ang termino sa mayor niadtong 2010.
Kasong grave misconduct ug dishonesty ang gipasaka ni Ayuman kang Osmeña apan ang mayor niingon nga kining susama nga kaso gi-dismiss na kaniadto sa Ombudsman.
Matud ni Osmeña nga ang tag-iya sa Bigfoot Entertainment wala na modayon pagdonar sa duha ka Dodge Charger nga sakyanan pagkasayud niini nga ang iyang termino pagka-mayor kutob ra sa Hunyo 30, 2010. Ang duha ka sakyanan gipalit sa maguwang sa mayor nga si Minnie Osmeña. (BANAT NEWS)