CEBU, Philippines - Gibana-banang unom ka tiil nga bitin, gisibat sa barangay konsehal human kini nakuha gikan sa wire sa kuryente sa may Natalio Bacalso Avenue habig sa Barangay Poblacion Ward 3 sa Lungsod sa Minglanilla kagahapon sa buntag.
Alas 5 sa buntag pa nabantayan sa mga residente sa lugar nga nagbitay sa wire sa kuryente ang maong bitin.
Gumikan sa maong talan-awon, inanay nga nagkadaghan ang tawo nga mitapok aron mangusyoso samtang nagpaabot nga kun kanus-a ug kinsa ang makakuha niini. Ang panagtapok sa katawhan, nakamugna og huot nga dagan sa trapiko.
Si PO3 Humprey Alpas nga residente sa lugar, nipusil sa bitin kaduha ka higayon gamit ang air gun nga adunay bala nga pellet.
Iyang gibutyag nga gisugo siya sa barangay opisyales sa pagpusil sa bitin aron makuha na kini aron sab molugak na ang dagan sa trapiko.
Iyang gipasabot nga dili makamatay ang iyang pagpusil kay sa ikog ra man kini niya giigo. Apan ang iyang pagpusil, wala kini mosaler hangtud nga naabot ang mga empleyado sa Visayan Electric Company (VECO) ug mao nay nikuha sa bitin.
Dihang gipakanaug ang bitin, daghan ang niangkon nga sila maoy tag-iya niini, apan usa ka tawo nga nagsul-ob og vest nga giila sa mga residente nga usa ka barangay tanod ang nakauna sa pagkuha sa bitin ug gisibat sakay sa motorsiklo.
Nawagtang na lang og kalit ang maong tanod nga nagdala sa bitin hinungdan nga nabungkag ang nagtapok nga tawo ingon man nabalik sa normal ang dagan sa trapiko sa lugar.
Ang nagkuha sa bitin, nailhan nga si Rey Delsocoro nga usa diay ka barangay konsehal sa Tunghaan.
Sa pagkakaron siya una ang moatiman sa maong bitin samtang wala pa mopatim-aw ang tinuod nga tag-iya niini.
Iya sab gipatambalan ang bitin tungod kay samdan kini sa ikog human maigo sa pagpusil sa polis gamit ang air gun. (BANAT NEWS)