Refilling station gilungkab, mga alahas nasakiyo

CEBU, Philippines - Ang kapolisan sa Presinto 4 sa Mandaue City Police Office (MCPO) misusi sa nahitabong pagpanglungkab sa usa  ka water refilling station sa dalan M. L. Quezon, Barangay Casuntingan nga nadiskubrehan sa miaging buntag.

Matud ni PO2 Oliver Gipanao nga nasakiyo sa wala pa mailhing kawatan ang mga gold nga kwentas ug ariyos ug diamond nga gisulod sa steel cabinet nga gilungkab.

Dugang sa polis nga si Renaldo Pardillo, technician sa American Water Technology maoy nagtaho ngadto sa anak sa tag-iya nga si Charmane Tui sa nahitabong pagpanglungkab dihang giablihan niini ang refilling station.

Si PSIns. Pedy Nova, hepe sa kapolisan sa Presinto 4, kasamtangang nangayo og kopya sa CCTV footage alang sa pag-ila sa mga wala mailhing tawo nga naglungkab sa pultahan. Sutaon sab nila kun ang maong insidente, inside job ba. (BANAT NEWS)