CEBU, Philippines - Dili na unya babag nga mahimong state college ang Talisay City College (TCC) human si Mayor Eduardo Gullas ang nihatag og pabor sa eskuwelahan.
Si Dr. Ritchel Bacaltos, presidente sa TCC, nipadayag sa iyang kalipay tungod kay dili na makuhaan ang ilang luna nga kasamtangan nga gigamit.
Kini human si Gullas nibakwi sa iyang desisyon nga mohatag og 200 metros kwadrado alang sa kapolisan aron tukuran sa modernong police station.
Si Bacaltos niingon nga maapektahan gyud nga mahimong state college ang ilang tunghaan kun gidayon pa sa mayor ang paghatag sa luna ngadto sa kapolisan.
Matud niya nga daghan siya og plano alang sa TCC apil na niini ang pagpadako gyud sa tunghaan.
Si Gullas daling niuyon dihang nibisita ang kadagkuan sa kapolisan sa siyudad ug gisukod ang luna sa police station ingon man ang yuta nga ilang ihatag.
Ang proyekto mokantidad og P14 milyones nga iya sa Philippine National Police. Si Gullas gianugonan sa maong budget hinungdan nga siya niuyon dayon sa maong plano.
Apan nausab ang huna-huna sa mayor ug nipalabi sa TCC. - /GMR) (BANAT NEWS)