CEBU, Philippines - Tulo ka mga menor de edad ang naluwas sa mga polis gikan sa managlahing anti-illegal drugs operation sa Dakbayan sa Sugbo ug sa Dakbayan sa Talisay.
Sa Sitio Senper, Brgy. Carreta sa Dakbayan sa Sugbo naluwas sa mga sakop sa Mabolo Police Station ang 16 anyos nga batan-on atol sa pagresponde nila sa tawag sa usa ka concerned citizen kabahin sa pagpamaligya og ilegal nga drugas sa usa ka Marivic Bola-Bola sa maong lugar.
Ang hepe sa Mabolo Police, Sr. Insp. Jose Mandal miingon nga sa pag-abot sa mga polis ilang nakita ang maong minor de edad nga naghupot og usa ka pakete nga gituohang shabu. Nadakpan usab ang usa ka Jason Odover nga usa ka kusinero ug giingong naaktohang nagsuyop og drugas sa maong dapit. Apan wala na diha si Bola-Bola kinsa gitumbok sa menor de edad nga diha gikan ang iyang shabu.
Gawas ni Odover ug 16 anyos miabot sab sa 19 ka mga tawo ang nasikop niadtong nakalabay nga gabii sa managlahing operasyon sa kapolisan sa dakbayan sa Sugbo.
Samtang ang mga sakop sa Philippine Drug Enforcement Agency Regional Office- 7 (PDEA-7) misikop sa usa ka suspetsadong drug pusher nga si Richard Torreon, 51, human na-serve ang search warrant diha sa Magsaysay Street, Pasil, sa mao gihapong dakbayan. Nakuhaan og lima ka dagko nga putos sa gituohang shabu nga nagkantidad og P90 mil. Samtang sa Dakbayan sa Talisay, duha ka menor de edad nga gidudahang gihimong drug runners sa usa ka Raymond Gaviola ang naluwas sa kapolisan diha sa Sitio Magay, Brgy. Tanke.
Ang kapulisan nirumbo sa maong lugar human ilang nahibaw-an nga nasigpatan ang wanted ug may warrant of arrest sa kaso sa ilegal nga drugas si Gaviola.
Apan nakabantay si Gaviola sa mga polis ug mikaratil og dagan ug natagak ang sudlanan niini sa drugas nga adunay sud nga 16 ka gagmay nga paketeng gituohang shabu.
Sa iyang pag-ikyas iyang nabiyaan ang duha ka menor de edad nga iyang mga drug runners ug pulos nakuhaan og tag-upat ka gagmay nga paketeng shabu. Gikatakdang dad-on ang duha sa social welfare officer aron pagtino kun angayan ba silang kasohan kauban si Gaviola. - /EIM) (BANAT NEWS)