Kaso nilang Yapha, Cuenco gibasura

CEBU, Philippines - Gibasura sa Sandiganbayan ang motion for partial reconsideration sa prosekusyon kabahin sa pag-dismiss sa kaso batok nila ni kanhi kongresista Antonio Cuenco ug Antonio Yapha, Jr. ug kanhi director sa Department of Agriculture-7, Eduardo Lecciones Jr. Si Yapha maoy kasamtangang bise mayor sa Dakbayan sa Toledo samtang retirado na sila si Cuenco ug Lecciones.

Gibasura sa korte ang maong motion tungod sa kakuwang sa merito hinungdan nga una na nga gibasura ang kaso may kalabutan sa fertilizer fund scam tungod usab sa paglangan sa Ombudsman sa paghukom niini.

Giingong niabot ngadto sa 10 ka tuig ug unom ka buwan ang gidugayon sa disposition sa Ombudsman sa kaso samtang wala naesplikar ang paglangan niini.

Niadtong Pebrero 17, 2006 na-docket ang kaso alang sa fact-finding investigation ug niadtong Mayo 19, 2006 ug Nobiyembre 13, 2006 gipasaka sa Ombudsman-Visayas ang records sa kaso ngadto sa Field Investigation Office nga apil sa imbestigasyon sa Task Force Abuno.

Niadtong Disyembre 15, 2006 nasuta sa evaluation report nga ang mga kaso walay kalabutan sa P728 milyones nga fertilizer fund investigation sa Task Force Abuno apan posibleng lakip kini sa P1.1 bilyones nga fertilizer fund scam.

Niadtong Mayo 27, 2014 ang kaso gi-upgrade ug gi-docket isip criminal case alang sa preliminary investigation. Ang Ombudsman-Visayas nimando sa mga sinumbong sa pagduso og counter-affidavits. (BANAT NEWS)