CEBU, Philippines - Kapin sa P25 bilyones nga balor sa proyekto ang naapil sa Annual Investment Program sa tuig 2018 alang sa Probinsiya sa Sugbo nga anaa sa lainlaing ahensiya sa nasudnong kagamhanan.
Matud ni Architect Florentino Nimor Jr, officer-in-charge sa Provincial Planning and Development Office ug secretary sa Provincial Development Council, nga P20 bilyones sa maong pundo gikan sa Department of Public Works and Highways.
Anaa sa ubang ahensiya ang laing P5 bilyones gibahinbahin sama sa National Irrigation Administration, Environmental Management Bureau, Bureau of Fisheries and Aquatic Resources, Department of Agrarian Reform, Department of Science and Technology, Philippine Coconut Authority, Department of Trade and Industry, ug National Economic and Development Authority.
Atol sa PDC Meeting kagahapon, giaprobahan ang mga proyekto nga gisugyot sa maong mga ahensiya. (Brenda D. Batuto/GMR)
Bulacao brgy hall himoong birthing center
Himoon na lang nga birthing center ang karaang barangay hall sa Bulacao sa higayon nga mahuman na ang bag-ong gipatukod.
Kini human ang hepe sa kapolisan sa Dakbayan sa Talisay, Supt. Emerson Dante, niingon nga kuwang sila og tawo nga ibutang kung kini himoong police sub-station.
Buot unta ni Bulacao Kapitan Raul Cabañero nga mabutangan og sub-station ang ilang lugar aron paspas ang pagresponde sa alarma ingon man mapugngan ang ilegal nga kalihukan sa ilang lugar sama sa ginadiling drugas.
Matud niya nga sa una ang kapolisan ang nangita og lugar nga kabutangan og sub-station apan karon nga naa na, ang kapolisan na sab ang nibalibad.
Hinoon girespetuhan ni Cabañero ang desisyon ni Dante. (BANAT NEWS)