Girespeto ang bag-ong desisyon sa mayor

CEBU, Philippines - Wa magdahom ang hepe sa kapolisan sa Dakbayan sa Talisay nga kalit lang mausab ang huna-huna ni Talisay City Mayor Eduardo Gullas kalabot sa plano niini nga mohatag og luna sa Philippine National Police aron mahinayon ang pagtukod sa modernong police station sa nahisgutang lugar.

Si PSupt. Emerson Dante niingon nga anugon ang maong oportunidad kay andam na ang Campo Crame sa paggasto og P13 milyones alang sa katukoran sa modernong police station nga walay gasto ang siyudad.

Nasayran nga ang rekisitos nga gipangayo sa Campo Crame mao ang gidak-on sa luna nga gikinahanglan iya gyud sa PNP apan ang Talisay City Police nagkuwang sa luna nga moabot sa 200 metros kwadrado.

Unang gipasalig ni Mayor Gullas nga mohatag siya og luna nga gikinahanglan sa PNP mao ang anaa sa Talisay City College aron lang matuman ang maong proyekto.

Gani nipasar og resolusyon ang konseho sa pagtugot kang Gullas nga modonar og yuta sa PNP apan sa kalit lang nausab ang huna-huna niini.

Matud ni PSupt. Dante nga iyang pahibaw-on ang iyang mga labaw sa desisyon sa mayor human niya nabasahan sa mga mantalaan. Siya nagkanayon nga wala siya makatuo kay humana og inspeksyon ang lugar nga tukoran ug ang pagdonar sa yuta na lang ang kuwang.

Sigon pa niya nga angayan na ang Talisay nga aduna’y dako ug standard nga police station kay sa kasamtangan anaa lang sa Class C nga police station ug wala mahaum sa siyudad nga usa na ka Class A.

Hinuon girespeto ni Dante ang nahimong desisyon sa mayor.

Nasayran nga ang mayor nipasabot nga ang Aboitiz misaad kaniya nga mohatag og building aron himoong command center ug nalakip na niini ang kapolisan. - DILT) (BANAT NEWS)