CEBU, Philippines - Miabot sa napulo ka tawo ang nalandig sa tambalanan ug tulo niini kritikal ang kondisyon human misampak ang usa ka motorsiklo sa ilang gisakyan nga motorcab sa Barangay Pooc sa Lungsod sa Santa Fe sa isla sa Bantayan pasado alas 11 niadtong nakalabay nga gabii.
Ang drayber sa motorcab giila nga si Nox Villacarlos samtang ang iyang mga pasahero mao silang Anirose Aniban, Sammy Tendido, Roberto Uy, Norman Uy, Paul Desabille, Melvin Caranzo, Aladin Maru ug Marionel Tendido nga pulos mga taga Lungsod sa Madridejos.
Samtang ang drayber sa motorsiklo mao si Danilo Deo Contiga, taga Barangay Obo-ob sa Lungsod sa Bantayan.
Ang desk officer sa Santa Fe Police Station nga si PO1 Gigi Villegas miingon nga gumikan sa kakusog sa dagan ni Contiga, nabungkag ang iyang motorsiklo diin kini nakaangkon og daghang bali sa lawas, naliki ang ulo ug anaa sa delikadong kondisyon nga gi-obserbaran karon sa tambalanan sa Sugbo.
Sumala pa ni PO1 Villegas nga atol sa maong hitabo gikatahong ubos sa ilimnong makahubog si Contiga nga gikan mitambong og birthday party sa iyang paryente.
Sa iyang pagpauli sakay sa motorsiklo nga kusog nga nagpadagan, misampak kini sa gikatagbo nga motorcab nga gisakyan sa mga biktima. Si Villegas miingon nga ang drayber sa motorcab ug ang iyang pasahero nga si Desabille parehos nga gitaoran og oxygen ug talandugon sab ang kahimtang ug gikatakdang ibalhin sa tambalanan sa Siyudad sa Sugbo.
Dugang sa polis nga kun makalingkawas sa kamatayon si Contiga, nagpaabot sab niya ang patong-patong nga kaso nga gikatakdang ipasaka sa mga pamilya sa mga biktima. - /DILT) (BANAT NEWS)