CEBU, Philippines - Wala mosalir ang modus sa babaye nga nangawat sulod sa usa ka tindahan sa Barangay Tabunok, Dakbayan sa Talisay niadtong niaging adlaw.
Si Flaviano Bueno Jr., 33-anyos, house detective sa Metro Fresh Easy, ang nidala sa iyang dinakpan ngadto sa buhatan sa kapolisan nga si Mirenz Elim, 19-anyos, dalaga nga nagpuyo sa nahisgutang lugar.
Si Bueno nga maoy duty niadtong higayona ang nakabantay nang daan sa suspek nga lahi ang iyang panglihok-lihok hinungdan nga wala na gyud niya buhii ang iyang atensyon sa maong babaye.
Nagpakaaron-ingnon nga kostumer si Elim nga nagkugos og bata apan nanguha kini og shampoo ug duha ka klase nga toothpaste nga wala’y bayad-bayad.
Matud ni PO2 Romanito Dinapo sa Talisay City Police Station nga nagkugos sa iyang bata ang suspek samtang nihimo sa krimen.
Apan bisan pa man niini pursigido ang tagdumala sa tindahan nga pasakaan og kaso ang suspek aron kini nga motagam. (BANAT NEWS)