CEBU, Philippines - Nakaangkon og 15 ka tahi sa samad ang usa ka polis sa Dakbayan sa Talisay dihang nadasmagan og motor sa Barangay Linao sa iyang pagpalabang sa usa ka edaran.
Si PO2 Jude Enemecio, 45-anyos, minyo nga taga Sunrise Village, Pardo, Siyudad sa Sugbo, ang nalandig sa tambalanan human naigo sa naghaguros nga motor nga gimaneho ni Oliver Bacus, 44-anyos, minyo nga taga Tinago, Siyudad sa Sugbo.
Si PO3 Junyl Ater sa Talisay City Police Station nagkanayon nga duty si Enemecio niadtong higayona nga nagmaneho sa ilang patrol car.
Apan sa iyang pag-abot sa lugar, iyang nakit-an ang usa ka edaran nga si Flordeliz Asenero, 72-anyos, taga Lower Linao nga naglisud sa paglabang sa highway.
Si Enemecio ang nanaug sa patrol car ug nipalabang sa tiguwang apan si Bacus ang wala kabantay ug ni-overtake sa nag-una nga sakyanan.
Asoy pa ni Ater nga gigakus ni Enemecio ang tiguwang hangtud nga siya maoy naugbok sa karsada.
Nanghilam-os sa dugo si Enemecio hinungdan nga gidali kini og dala sa tambalanan.
Ang kauban ni Enemecio nga si SPO2 Yvonne Ilustrisimo nihulagway nga 15 gyud ka tahi ang naangkon ni Enemecio tungod sa maong panghitabo.
Ang tiguwang ang naluwas ra ug nakaangkon lang og gamay nga bun-og.
Gitanggong sa bilangguan ang nakadasmag samtang nagpaabot nga pasakaan og kaso. (BANAT NEWS)