Barangay hall himoong police sub-station
CEBU, Philippines - Ihatag sa mga opisyales sa Barangay Bulacao sa Dakbayan sa Talisay ang ilang barangay hall ngadto sa kapolisan aron himoon nilang laing buhatan aron paspas ang ilang pagresponde sa bisan unsang alarma sa nahisgutang dapit ug kasikbit niining mga lugar.
Gipahibawo ni Kapitan Raul Cabañero kinsa mao sab ang presidente sa Association of Barangay Council (ABC) nga nagkasinabot sila sa konseho sa barangay nga ilang ihatag sa Talisay City Police Station ang ilang karaang barangay hall aron himoon kining sub-station kay hapit na man mahuman ang ilang bag-ong gipahimo nga barangay hall nga matapos karong buwan sa Abril.
Matud pa niya nga kun himoon gyud nga sub-station ang karaang barangay hall, ikalipay kaayo kini nila tungod kay duol na sila sa tigpanalipod sa balaud. Gawas sa ilang barangay asoy ni Cabañero nga hasta sab unya ang silingan nga mga barangay ang makapahimos sa pagpaduol sa mga polis.
Nasayran nga daghang kapitan ang nangreklamo sa kalangay sa pagresponde sa mga polis ilabi na kun manawag sila niini.
Ang Talisay City Police Station adunay kapin 20 ka mga bag-ong polis nga gidestino sa lugar aron makatabang sa paghatag og kahapsay ug kalinaw sa maong siyudad. (BANAT NEWS)
- Latest
