CEBU, Philippines - Wala na pabantayi sa mayor sa Dakbayan sa Mandaue ang mga basurang imported nga anaa mahimutang sa Brgy Tingub kini human adunay nasigpatan nga mga armadong tawo nga magbadhas sa lugar.
Gimanduan ni Mandaue City Mayor Luigi Quisumbing ang mga eco warden nga sakop sa City Environmental and Natural Resources Office sa pagbiya sa ilang gibantayang imported nga basura gikan sa South Korea human sa taho nga adunay nasigpatan nga mga armadong lalaki nga nagsakay og pajero ug molabay sa dapit matag karon ug unya.
Nunot sa maong kamandoan, giawhag ni Quisumbing ang kapolisan sa Presinto 6 sa Mandaue City Police Office nga magpatrolya sa dapit. Nasayran nga gibantayan sa mga eco warden ang maong mga basura human gipahibawo sa DENR-7 nga delikado kini sa panglawas sa publiko.
Gisugdan na sa paghakot ang uban sa maong mga basura ug giingong 11 na ka dump truck ang nahakot apan daghan pa gihapon ang nahibilin mao nga gipabantayan.
Bisan og mi-uyon na ang BOC sa pagpasubasta sa maong mga basura, wala kini makapabugnaw sa tinguha sa kagamhanan sa Mandaue sa pagpasaka og kaso batok sa mga tawo nga maoy responsable sa pagtam-ok niini sa siyudad. (BANAT NEWS)