200 balay nasunog

CEBU, Philippines - Mokabat dul-an 200 ka panimalay ang hingpit nga naugdaw sa sunog nga niigo sa lima ka mga sitio sa Brgy. Tisa ug Labangon sayo kagahapon sa kaadlawon.

Upat ka sitio sa Brgy. Tisa ang naglangkob sa Sitio Lutao-lutao, Cacao, Luhai, ug Kauswagan ang apektado sa sunog, samtang sa Labangon mao ang Salvador.

Matud pa ni Chief Inspector Rogelio Bongabong ang Fire Marshall sa Dakbayan sa Sugbo alas 12:28 nila nadawat ang maong alarma ug giisa ngadto sa Task Force Alpha alas 2:01.

Nakontrolar kini alas 2:33  apan gilamoy gyud ang 150 ka panimalay nga gibana-banang nagbilin og P1.5 milyones nga danyos.

Matud pa ni Bongabong nagsugod ang sunog sa panimalay ni Narciso Roble kinsa ilang imbitaron aron pangutan-on kun unsay nahitabo.

Sumala pa ni Bongabong, naglisod sila pagsud sa lugar tungod sa kahagip-ot sa agianan mao nga gisumpay-sumpay nila ang mga fire hoses aron maabot sa fire scene.

Gihulagway ni Bongabong ang sunog kagahapon susama sa sunog kaniadto sa Brgy. Quiot nga nagbalhinbalhin sila tungod kay ang hangin pasaka sa bukid.

Mapasalamaton lang hinoon si Bongabong nga walay nakalas sa insidente.

Matud pa niya, kinahanglang ipaubos sa reblocking ang maong lugar aron dili maglisod ang kabomberohan.

Si Simeon Duazo, 40, taga Salvador ug usa sa mga nasunogan wa magtuo nga maabtan iyang balay maong wala silay nabitbit bisan sapot apan luwas ra hinoon iyang pamilya.

Ang kapitan sa Tisa ug kasamtangan nga ABC President nga si Philip Zafra nitug-an nga nideklarar na sila og state of calamity.

Ang mga nasunogan kasamtangan nga gipahimutang sa Labangon Sports Complex ug La Paloma Sports Complex.

Base sa datos sa Department of Social Welfare and Services, 275 ka pamilya ang apektado, ug 194 ka panimalay hingpit nga naugdaw, upat ang partially burned ug usa ang nakan-an sa kalayo. (BANAT NEWS)