CEBU, Philippines - Ang mga opisyal sa Barangay Ermita, Dakbayan sa Sugbo naghimo og ordinansa nga dili papahawaon sa ilang nahimutangan ang mga tindera nga nanginabuhi sa aseras nga sakop sa ilang barangay.
Kining maong ordinansa gipasar sa konseho sa Barangay Ermita sa wala pa masuspenso si Kapitan Felicisimo “Imok” Rupinta ug ang pito ka konsehal sa mao nga barangay tungod sa kaso nga giatubang nila sa Ombudsman.
Matud sa mga opisyal sa Ermita nga ang gipasar nila nga ordinansa nahasubay sa Executive Order 452 nga giisyu sa Malacañang kaniadtong 1997 ug padayon pa nga gipatuman sa nasudnong kagamhanan.
Ang kamandoan sa Malacañang nga giluwatan 20 ka tuig na ang nakalabay gitumong aron nga pagsiguro nga dili maapektohan ang kahimtang sa mga kabus nga tindera nga nagpakabuhi sa publiko nga dapit. Gipasabot sa mga opisyal sa Ermita nga ang dakbayan, matag karon ug unya, mopahigayon og night market ug Tabo sa Banay nga migamit og karsada nga nakabenepisyo sa mga kabus nga tindera.
Ang ilang argumento mao nga ang mga tindera nga naninda sa aseras sa karsada sa Ermita susama ra og sitwasyon sa mga naninda sa Tabo sa Banay nga gihatagan og prebilihiyo sa dakbayan.
Ubos sa lagda, ang mga ordinansa nga gipasar sa barangay kinahanglan pa nga i-review sa mga konseho sa lungsod o dakbayan sa dili pa kini ipatuman. Ang Committee on Laws and Ordinances nga gipangulohan ni Konsehal Raymond Garcia maoy gitahasan pag-review sa ordinansa.
Apan sa pasiunang pagtan-aw ni Garcia mao nga ang ordinansa lisud nga maaprobahan tungod kay naglatid kini nga dili gyud mapapahawa ang mga tindera sa ilang nahimutangan. (BANAT NEWS)