Sugalan gironda, shabu ang nasakmit
CEBU, Philippines - Nasikop sa kapolisan ang 48-anyos nga lalaki ug nasakmit ang mokabat sa P180,000 nga kantidad sa shabu atol sa anti-illegal gambling operation nga gihimo sa District 5, Pulpogan, Lungsod sa Consolacion.
Si Senior Inspector William Humoc, hepe sa kapolisan sa maong lungsod, niila sa nadakpan nga si Rudy Capangpangan Sr., kinsa nasakmitan og 15.2 gramos nga shabu.
Matud ni Humoc nga gihimo nila ang operasyon sa lugar diin usab ang dinakpan maoy gitumbok nga nagpasiugda sa maong ilegal nga sugal.
Sakay sa tinted nga sakyanan, nasigpatan sa kapolisan ang suspek sa lugar nga nagtunol og shabu ngadto sa customer hinungdan nga sila nanaug ug nagpaila nga mga polis hinungdan nga nag-alibwag sa pagpanagan ang mga tawo apan nagunitan si Capangpangan.
Matud ni Humoc nga dayag na kaayo ang mga pushers sa ilang pagpamaligya og shabu tungod kay kompiyansa na man sila nga ang mga polis dili na mohimo og operasyon batok ilegal nga drugas. (BANAT NEWS)
- Latest
