Nag-rape sa 4 ka buwan nga bata gikiha na

CEBU, Philippines - Gikiha na og Statutory Rape kadtong tawo nga giingong nilugos sa upat ka buwan nga bata didto sa Barangay Perrelos, Carcar sa niaging semana.

Ang kaso batok ni Jonathan Marfe, nga padayong gitanggong sa bilanggoan, gipasaka sa kapolisan sa Carcar didto sa Cebu Provincial Prosecutor’s Office ug ang suspek dili tugotan nga makapiyansa.

Samtang ang Department of Social Welfare and Services (DSWS) sa Carcar motan-aw kun unsay ilang mahatag nga tabang sa biktima sa lugos. Si Social Worker Edna Rigodo misusi na kun unsay serbisyo nga ikahatag nila sa bata. Pagka karon gitutukan sa mga social worker ang Psycho social intervention sa bata.

Ang bata natulog sulod sa ilang balay apan   gisulod sa suspek ug gidala sa kasagbotan ug didto gilugos. Giingon nga drug user ang suspek.

Samtang, gibisita ni Gobernador Hilario Davide III ang bata kagahapon sa hapon diha sa Area Vocational Rehabilitation Center II nga gidumala sa DSWD-7 sa Barangay Labangon, dakbayan sa Sugbo.

Ang gobernador niduaw sa bata aron personal niya nga makita ang kahimtang niini. Misaad si Davide nga ang probinsya sa Sugbo mohatag og P10 mil nga hinabang ngadto sa pamilya sa bata.

Gawas niana, ipaayo usab sa Kapitolyo ang balay sa ginikanan sa biktima. Matud ni Marivic Garces, ang pangulo sa Provincial Social Welfare and Development Office (PSWDO) nga nagpadala na ang Kapitolyo og personnel sa engineering’s office aron nga masusi ang balay sa ginikanan sa biktima. Le Phyllis F. Antojado ug Rowena D. Capistrano (BANAT NEWS)