Mga kabus tabangan aron makapataod og kuryente

CEBU, Philippines - Gipatun-an karon ni Mayor Tomas Osmeña ang iyang plano nga ang dakbayan sa Sugbo mohatag og libre nga alambre sa kuryente ngadto sa mga kabus nga pamilya aron magamit nila pag-instalar sa ilang kabalayan.

Matud ni Osmeña nga nakabantay siya nga adunay mga sunog nga nahitabo diin ang hinungdan mao ang pagpataka na lang og gamit sa mga kabus nga pamilya og electrical connections diha sa ilang panimalay. Ang mga duplex wire nga gigamit sa telepono dili mabaligya sa mga surplus shops mao nga kun adunay mga mabugto nga telephone wires, gamiton ra kini sa uban nga hayhayan.

Apan matud sa mayor nga nakadawat siya’g report nga adunay mga kabus nga pamilya nga mogamit sa mga telephone wires isip electrical connections sa ilang panimalay ug usahay maoy makamugna og sunog.

Ang mga kabus nga lumolupyo dinhi sa dakbayan gitabangan na sa City Hall pinaagi sa paghatag kanila og higayon nga makapa-instalar og kuryente nga dili kaayo kuti ang pagkuha sa dukomento.

Apan bisan pa niini, daghang kabus nga pamilya ang dili gihapon makapataod og kuryente sa ilang kabalayan kay wala sila’y kuwarta nga magasto pagpalit og mga alambre ug ubang kagamitan sa pag-instalar.

Matud ni Osmeña nga kini maoy gusto niya nga matabangan. Ang nasudnong kagamhanan, pinaagi sa Department of Energy (DOE) may programa hinoon nga motabang sa mga kabus nga pamilya ug abagahon nila ang gastohan alang sa mga electrical connections ug ang pag-instalar. (BANAT NEWS)