Mga isla gibutangan og mga lider alang DRRMO
CEBU, Philippines - Ang Cebu Provincial Disaster Risk Reduction and Management Office mitudlo og ilang mga sinaligan sa mga dagkong isla nga sakop sa lalawigan, sama sa Bantayan island ug isla sa Camotes.
Matud ni Julius Regner, ang tigpamaba sa PDRRMO, nga midestino sila og magsilbing tsirman sa mga isla aron maoy mangulo sa tanang disaster office sa maong dapit ug magsilbe nga island chairman.
Si Regner nagkanayon nga ila kining gibuhat aron mapadali ang pag-communicate sa mga disaster offices kabahin sa mga nagkadaiyang gimbuhaton sa ilang buhatan, sama sa disaster preparedness, emergency response, rescue operation ug bisan ang rehabilitation.
“Mahibalo na sila sa program nga gilunsad ug gihimo sa probinsya karon kay makaapil na sila sa meeting,” matud ni Regner.
Siya midugang nga gawas sa pagtudlo og island chairman, magbutang usab sila og mga assistant cluster head sa mga local disaster offices sa probinsya.
Kagahapon ang Liga sa mga Local Disaster Risk Reduction and Management Office (LDRRMO) nagtigom kini alang sa ilang labing una nga General Assembly karong tuiga.
Ilang gihisgotan ang kabahin sa Project NOAH o ang Nationwide Operational Assessment of Hazards, ang flagship disaster management initiative sa Department of Science and Technology (DOST) nga unang gikataho nga mawagtang tungod sa kakulang sa pundo.
Apil usab sa ilang gituki ang kabahin sa Cebu Youth Agenda, Disaster Risk Reduction Climate Change Adaptation Project sa probinsya, ug ang Our Cebu Program. (BANAT NEWS)
- Latest
