Basurahan nisiga, 6 balay, junkshop ugdaw

CEBU, Philippines - Hingpit nga naugdaw ang unom ka panimalay ug usa ka junkshop atol sa sunog nga niigo kagahapon sa buntag sa Purok Tambis, Umapad, Dakbayan sa Mandaue.

Kini ang gitug-an ni Senior Fire Officer 2 Cipriano Codilla, ang fire investigator sa dakbayan.

Matud ni Codilla nga alas 10 sa buntag nila nadawat ang alarma sa sunog ug nakontrolar sulod sa 23 minutos ug giisa nila sa second alarm ug dili mominus sa P35,000 ang danyos.

Sumala pa ni Codilla nga kalit lang niulbo ang mga basura sa dumpsite nga maoy hinungdan sa sunog.

Hinoon wala silay natala nga naangol atol sa maong sunog.

Wala sab naglisud ang kabomberuhan sa pagtubag sa alarma. (BANAT NEWS)