CEBU, Philippines - Babayeng tulo ka buwan nga buntis nga taga Dakbayan sa Sugbo ang konpirmado nga adunay Zika Virus human gipagawas sa DOH ang resulta sa confirmatory test.
Kini maoy gitug-an ni Renan Cimafranca, ang pangulo sa Regional Epidemiology and Surveillance Unit sa Department of Health sa rehiyon nga nahinabi sa Banat News.
Matud pa ni Cimafranca, ang maong kaso maoy ikaduha sa dakbayan. Ang una nga kasong natala nahitabo niadtong buwan sa Septiyembre. Kining bag-o ilang nasayran niadtong ikatulo nga semana sa Enero ug karon semanaha niguwa ang confirmatory test. Ang maong ginang nagpangidaron og baynte anyos kapin ug nagtrabaho sa usa ka pribadong kompanya.
Sumala pa ni Cimafranca, nagpa examine sa iyang OB-Gyne ang maong ginang tungod kay nahibulong siya nga aduna siyay mga rashes sa panit. Tungod niini gipaubos kini sa laboratory examination kay usa man ang rashes sa mga sintomas sa maong virus ug didto matud pa nakompirmar nga Zika virus gayud kini.
Gitug-an ni Cimafranca nga una kining anak nga gisabak sa maong ginang hinungdan nga ipaubos nila siya sa subsob nga monitoring kauban sa Ob-Gyne niini hangtod nga kini manganak.
Dugang pa ni Cimafranca, hangtod karon wala pay tambal ang maong virus hinungdan matag karon ug unya mobisita gayud ang maong ginang sa iyang doktor aron kanunay ma-check ang pagtubo sa iyang gisabak.
Gibutyag ni Cimafranca adunay entomological survey nga gipahigayon karon sa pinuy-anan ug sa trabahoan sa maong ginang aron masusi kung aduna bay mga lamok didto. Ang lamok nga carrier sa Zika virus gitawag og Aedes Egypti nga mao usab ang carrier sa sakit nga dengue.
Giawhag ni Cimafranca, kung unsay ilang gihimo nga pagpangandam alang sa paglikay sa dengue, mao usab kini ang buhaton.
Matud ni Cimafranca ang Zika Virus Infection usa ka mosquito-borne disease ug 80 porsiyento sa mga kaso asymptomatic o wala ra kaayo’y mogawas nga sintomas apan kun duna man kini mao ang hilanat, panakit sa kabukogan, arthritis ug conjunctivitis o kanang mamuwa ang mga mata. (BANAT NEWS)