CEBU, Philippines - Nireklamo na ang kadagkoan sa St. Theresa’s College ngadto sa Cebu City Hall tungod sa pagdagsang sa mga libud-suroy nga kabataan sa palibot sa ilang tunghaan.
Tungod sa reklamo, si Raquel Arce nga maoy pangulo sa Cebu City Anti-Mendicancy Task Force, nakigtagbo dayon sa mga opisyal sa kapolisan ug sa Barangay Kamputhaw diin nasakop ang tunghaan.
Matud ni Arce nga ang kadagkoan sa STC wala na makaagwanta sa kalihukan sa mga libud-suroy nga kabataan nga sagad anha ra usab mangligdas kilid sa koral sa tunghaan kun abuton na sila og kakapoy.
Gitug-anan si Arce sa kadagkoan sa STC nga daghang tinun-an ang nireklamo kay adunay mga higayon nga ang mga libud-suroy nga kabataan mangilog kun magbitbit sila og pagkaon.
Usa ka tinun-an nisaysay sa Banat News nga kaduha gyud ka higayon nga napugos na lang siya paghatag sa iyang makaon ngadto sa bata nga nagkamuritsing sa hugaw ang kalawasan kay giuna man paghikap ang gibitbit niya nga pagkaon una kini nangayo.
Apan duna gyuy ubang tinun-an nga nitug-an nga may mga libud-suroy nga mangilog sa ilang pagkaon ug moderitso pagdagan.
Matud ni Arce nga magtinabangay sila sa kapolisan ug mga tanod sa paghimo’g kampanya batok sa mga libud-suroy.
Si Arce gitudlo nga pangulo sa City Anti-Mendicancy Task Force aron paghimo’g hugtanay nga kampanya batok sa mga libud-suroy nga kabataan ug sa mga makililimos. (BANAT NEWS)