Dengue vaccine dili pa mahatag

CEBU, Philippines - Bisan og buot nang manghatag og dengue vaccine ngadto sa kabataan ang Department of Health (DOH) apan ang Provincial Health Office (PHO) buot niining huwaton ang resulta sa gihimong pagtuon sa Barangay Guadalupe, dakbayan sa Sugbo.

Si Bokal Christopher Baricuatro, chairman sa committee on health sa hunta probinsiyal nagkanayon nga karong buwan sa Nobiyembre niining tuiga mahuman ang gipahigayong pagtuon kabahin sa dengue vaccine sa Guadalupe.

Apan buot sa DOH nga karong buwana manghatag na sila og dengue vaccine sa mga bata.

Ang mga estudyante sa elementarya sa publikong eskwelahan nga nagpanuigon og 9-anyos pataas ang makabenepisyo unya sa maong bakuna.

Matud ni Baricuatro nga magtagbo pa sila ni Dr. Rene Catan kabahin sa maong plano sa DOH.

Gibutyag niini nga usa sa concern ni Catan nga ang mahatagan sa bakuna kadto lang 9-anyos pataas diin labing daghan nga mortality ang 0-4-anyos. Hinuon gihangop ni Baricuatro ang pagpanghatag unya og dengue vaccine sa mga bata.

Matud niya nga daku na kaayo kining tabang nga mokunhod na unya ang kaso sa dengue bisan og ang mabakunahan 9-anyos lang pataas.

Ug kun mapatuman na ang pagpanghatag og dengue vaccine posibleng isentro sa probinsiya sa ilang mga programa batok sa dengue ang mga bata nga nagpanuigon og ubos sa 9-anyos. (BANAT NEWS)