Sundalo patay sa gubat vs NPA

CEBU, Philippines - Nagpadayon karon ang mga militar paglutos sa mga rebeldeng New People’s Army (NPA) didto sa kabungturan sa Tapaz, Capiz, ug gani napatyan na ang kasundalohan og usa ka kauban sa maong pinusilay.

Ang tigpamaba sa Armed Forces Central Command nga si Teniente Koronel Luzmindo Mamauag Jr. miingon nga milusad na sila og combat operations aron paglutos sa mga rebelde.

Kini human nga gimando ni Presidente Duterte nga undangon na ang pagpahigayon og peacetalks sa mga rebelde ug lutoson kadtong magdumili pagtahan nga malinawon. Wala pa ibutyag sa Centcom ang ngalan sa napatay’ng sundalo. Matud ni Mamauag nga gamiton nila ang tanang puwersa batok sa mga NPA ug sila na mismo ang mangita sa maong mga kaaway.

Si Mamauag miingon nga kaniadto sa suspendido pa ang peacetalks igo lang modepensa ang militar kun atakehon sila sa mga rebelde, apan karon sila na ang mohimo’g mga opensiba.

 Gitataw hinoon sa Centcom nga ang Sugbo, Bohol ug Siquijor hingpit na nga “insurgency free” o wala na’y problema sa NPA, apan dili sila mokumpiyansa kay basin og mamalik sila pag-organisar og mga sakop.

Kaniadto, ang mid-north district sa Sugbo nga naglakip sa kabukiran sa Catmon, Sogod, Danao, Tuburan, Tabuelan ug Asturias, maoy balhin-balhinan sa mga rebelde apan hingpit sila nga napakagiw sa mga militar. Apan bisan og milusad na og “all-out war” ang militar, si Mamauag nagpadayon sa pag-awhag niadtong mga rebelde nga gusto og kalinaw nga sila motahan na ug manginabuhi nga malinawon.

Si Mamauag nitug-an nga may pipila na ka rebelde nga nitahan kay gikapoyan na nga magtago-tago ug walay kalinaw sa ilang pagpuyo. Rowena D. Capistrano ug Jojo C. Ugdol (BANAT NEWS)