CEBU, Philippines - Nigahin ang Kapitolyo og P90 milyones alang sa katukuran sa mga classrooms sa tibuok Probinsiya sa Sugbo.
Kini ang gibutyag ni Bokal Christopher Baricuatro, chairman sa committee on education, human sa tigum sa Provincial School Board kagahapon diin gituki ang kapin pa sa 1,000 ka classrooms sa elementarya sa probinsiya.
Karong tuiga 60 ka classrooms ang gikatakdang ipatukod sa probinsiya nga maoy gastuhan sa maong pundo diin ang P60 milyones niini gigahin sa niagi pang tuig.
Apan wala gibutyag ni Baricuatro kung asa nga mga eskwelahan ang mahatagan sa maong mga classrooms.
Karong tuiga nigahin sab ang Kapitolyo og 4,700 ka arm chairs sa tanang eskwelahan sa probinsiya.
Matud ni Baricuatro nga maghuwat sila sa listahan gikan sa Department of Education aron masuta kung pila gyud ka arm chairs ang kuwang sa mga tunghaan.
Si Provincial Schools Division Superintendent Rhea Mar Angtud nibutyag nga ang probinsiya adunay kapin sa 500,000 ka tinun-an sa elementarya ug sekondarya ug nagsaka kini og unom ka porsiyento matag tuig. (BANAT NEWS)