Overloaded nga PUJs gipangdakop sa Mandaue

CEBU, Philippines - Mokabat na sa kapin usa ka libo ka mga PUJ drayber nga molabay sa kadalanan sa Dakbayan sa Mandaue ang nadakpan sa traffic enforcers tungod sa padayon nilang paghimo og kalapasan sa lagda sama sa pagbutang og extension nga lingkuranan ug nagpakapyot og mga pasahero.

Gipadayag ni Glenn Antigua, ang Operations Chief sa Traffic Enforcement Agency of Mandaue (TEAM) nga bisan sa higpit nilang pahimangno, daghan lang gihapong drayber ang ilang madakpan sa maong kalapasan.

Gipasabot niini nga ila gyung sakmiton ang mga extension nga lingkuran sa mga pasahero nga ilang madakpan ug dad-on kini sa ilang buhatan aron gub-on.

Dugang ni Antigua nga ang mga drayber nga madakpan, isyuhan nila kini og citation ticket alang sa ilang pagbayad og multa ngadto sa buhatan sa tresurero sa dakbayan sa kantidad nga P500. Gitug-an sa operations chief sa TEAM nga kasagaran nga mga drayber nga ilang madakpan mao ang mga nagbiyahe paingon sa Dakbayan sa Danao, Lungsod sa Compostela ug Lungsod sa Liloan.

Nabantayan ni Antigua nga ang mga PUJ drayber nga nagbiyahe sa Dakbayan sa Lapu-Lapu maoy nagtuman sa ilang pahimangno. (BANAT NEWS)