Investment scams ipasusi sa Provincial Board

CEBU, Philippines -  Ang hunta probinsyal miawhag sa Security and Exchange Commission (SEC)-7 sa pag-imbestigar, pagama og report ug mopahigayon og information dissemination kabahin sa ulahing uso karon sa pangilad  nga naglambigit sa investment schemes.

Si Bokal Thaddeo Jovito Ouano nagkanayon nga ang probinsiya adunay tumong sa paggama og policy ug programa nga magprotekta sa publiko ug makig-giyera batok sa mga bogus investment schemes. Ang internet maoy borderless ug labing attractive marketing tool diin ang mga mangingilad mo-take advantage sa pag-ilad sa publiko. Ang mga mangingilad mopasalig ngadto sa publiko nga ang kwarta nga ilang i-invest mabalik kini lakip na ang dakung tubo.

Ang publiko kasagaran mailad sa nagkalain-laing investment scams tungod sa kakuwang sa financial literacy ug awareness.

Ang pagkatap karon sa investment scams usa ka global problem diin ang mga mangingilad pinaagi sa internet manghaylo ngadto sa ilang biktima kabahin og mga negosyo nga walay hago ug dali kaayo nga motubo ang kwarta.

Dugang ni Ouano nga ang publiko kinahanglan nga magmabinantayon batok sa mga pangilad ug uban pang mga paagi sa mga mangingilad aron dili mausik ang ilang kuwarta nga hinaguan. (BANAT NEWS)