Kalihukan sa kadalanan i-regulate sa Mandaue

CEBU, Philippines - Nagtinguha karon ang Mandaue City Council sa pag-regulate sa paggamit sa mga sidewalk sa kadalanan sa maong dakbayan sa panahon sa mga dagkung kalihukan nga himoon sama sa sports o festival events.

Ang maong tinguha, gituki sa konseho atol sa ilang regular session pinaagi sa giduso nila nga ordinansahon nga ilang giaprobahan sa labing una niining pagbasa.

Gi-ulohan ang maong ordinansahon og “Street and Sidewalk Regulation Ordinance for Street Events” diin nag-awhag sa mga events organizer sa paghimo og ilang kaugalingong pamaagi sa paghatag og kasiguroan sa katawhan.

Si Bise Mayor Carlo Fortuna miingon nga sa panahon nga adunay marathons, ang basiyo sa mga mineral water iyang namatikdan nga ipanglabay ug magpasad sa kadalanan.

Gitataw niini nga labing mahinungdanon ang pagbutang gyud og permanente nga regulation sa higayon nga hingpit na unya nga kaaprubahan ang nahisgutang ordinansahon kay ang bisan unsa nga masinating kakulian sa ginagmay o dinagku nga kalihukan, makahatag kini og dakong epekto sa kalampusan. (BANAT NEWS)