Mga mayor sa Sugbo awhagon magpa-drug test

CEBU, Philippines - Ang presidente sa Cebu Municipal Mayor’s League (CMML) uyon nga magpa-drug test silang mga mayor aron masuta kun may pipila ba kanila nga tiggamitan og gidiling matang sa drugas. Si Tuburan Mayor Democrito “Aljun” Diamante miingon nga suwayan niya pagkumbinser ang iyang mga kaubang mayor nga makaayo kanila ang pagpa-drug test kay aron mawagtang ang pagduda sa katawhan.

Ang mga mayor dinhi sa Sugbo bag-ohay pa lang nga gipaadto sa Malacañang ni Presidente Rodrigo Duterte ug gipasidan-an nga dili gayud siya magpanuko paghimo’g lakang kun masakpan ang maong mga mayor nga nalambigit sa drugas.

Adunay mga tabi-tabi nga may pipila ka mayor dinhi sa Sugbo nga nagprotiher o kaha nalambigit gayud sa illegal drugs, apan ang kadagkoan sa Philippine Drug Enforcement Agency (PDEA) dili usab mohatag og kunpirmasyon niini.

Samtang si Mayor Edcel Enardecido sa lungsod sa Ayungon, Negros Oriental nga maoy presidente sa Municipal Mayor’s League sa ilang probinsya, nakahimo na og lakang ug nakumbinser niya ang mga mayor didto nga sila magpa drug test.

Nahibaw-an nga namalit na gani sila og mga drug testing kit aron maoy gamiton alang sa ipahigayon nga drug testing. May misugyot hinoon nga ang drug test angay’ng himoon pinaagi sa paggamit og buhok kay kini mas kredible.

Ang mga mayor gipatawag ni Duterte sa Malacañang tungod sa giingong pagkalambigit sa drugas ni kanhi mayor Rolando Espinosa sa Albuera, Leyte kang kansang panimalay nasakmitan og 11 kilos nga shabu atol sa usa ka pagpangronda.

Si Espinosa maoy amahan sa miangkong drug lord nga si Kerwin Espinosa nga gitanggong karon sa kapolisan. (BANAT NEWS)