CEBU, Philippines - Moabot na ngadto sa dul-an 50 mil ang natala sa Cebu Provincial Police Office (CPPO) nga mga drug surrenderers sa ilang gipahigayon nga mga anti-illegal drugs operation gikan sa buwan sa Hunyo hangtud sa Disyembre sa milabay’ng tuig.
Ang hepe sa CPPO, Senior Superintendent Eric Noble mibutyag ngadto kang Bise Gobernador Agnes Magpale nga miabot ngadto sa 242,308 ang ilang nabisita nga kabalayan sa pagpahigayon nila sa nahisgutang operasyon diin miresulta kini sa pagsurender sa 49,723 ka tawo nga nalambigit sa ginadiling drugas sa tibuok probinsiya.
Miabot ngadto sa 7,497.34 gramos nga shabu ang kinatibuk-ang nakompiska sa kapolisan sa probinsiya kini kabahin sa 928 ka buy-bust operation nga ilang gipahigayon, 404 saturation drives ug 99 sa pag-implementar og mga search warrants.
Si Noble kinsa miasumer isip hepe sa CPPO niadtong Oktubre 3, 2016 mibutyag nga gikan sa Enero 1 hangtud Disyembre, 2016 ang CPPO dunay nasikop nga 1,447 ka suspetsadong drug pushers, 921 users, tulo ka planters o mananumay og marijuana ug 151 ka wanted persons.
Sa pagpahigayon og Oplan Double Barrel Alpha sa kapolisan sa probinsiya miabot ngadto sa 68,188 ka punoan sa marijuana ang ilang nalarot diin giingong moabot ngadto sa P107 milyones ang kinatibuk-ang value niini base sa report sa Dangerous Drugs Board. Sa laing bahin, sa crime rate situation sa probinsiya gibutyag ni Noble nga sa tuig 2016 dunay significant nga 5.7 porsiyento nga pagkunhod sa krimen kompara sa tuig 2015.
Matud ni Noble nga sa theft mikunhod kini og 31 porsiyento, 37.4 porsiyento sa robbery ug 28 porsiyento sa homicide. (BANAT NEWS)