Kalangan sa honorarium gisulbad

CEBU, Philippines - Ang Association of Barangay Councils sa Dakbayan sa Sugbo na ang mohikay sa binuwan nga payroll sa mga kawani sa barangay.

Kini aron dili na malangan ang paghatag sa honorarium gikan sa kagamhanan sa siyudad alang sa mga kawani sa barangay ilabi na sa mga tanod ug mga sakop sa lupon.

Matud ni Tisa Barangay Kapitan ug ABC president Philip Zafra nga nagtigum sila kagahapon uban ni Konsehal Margarita Osmeña, City Treasurer, City Budget Officer, City Accountant ug representante sa City Administrator.

Nasabutan sa meeting nga ibalik ang papel sa ABC kaniadto nga motabang sa pagproseso sa payroll alang sa mga empleyado sa barangay aron mahan-ay ang tanan.

Magsugod ang proseso sa buhatan sa ABC diin ilang i-review ug kun kompleto na ang tanang rekisitos iduso kini sa buhatan ni Bimbo Fernandez, ang executive assistant sa Mayor.

Samtang sa pikas bahin, hangyuon usab ni Zafra ang Department of Public Services (DPS) nga kung mahimo umentuhan ang fuel allocation sa mga garbage trucks sa kabarangayan kay nakita nila nga dili paigo ang binuwan nga gasolina nga 150 litros matag truck.

Alang kang Zafra magtinabangay sila sa DPS aron sila mismo ang makadeterminar sa dugang panginahanglanon ug aron malikayan nga madugay ang pagkolekta sa basura sa mga barangay.

Napaabot na sa konsehal ngadto sa DPS ang maong hangyo ug nanghinaut nga unta ma-umentuhan ang fuel allocation sa garbage trucks sa mga barangay sa Siyudad sa Sugbo. (BANAT NEWS)