Medical-dental mission sa taga Kansas sa Carcar

CEBU, Philippines -  Mopahigayon na usab og laing medical-dental mission ang Phil. Medical Society of Greater Kansas City ug Phil. Nurses Association of Greater Kansas City sa Dakbayan sa Carcar karong Lunes hangtud Biyernes.

Mga residente sa mga kasikbit nga lugar sa Dakbayan sa Carcar ang makaapil sa libreng konsultasyon, medical, surgical ug dental services nga ipahigayon sa Carcar Provincial Hospital.

Matud ni Candice Acuña, information officer sa Dakbayan sa Carcar, nga ikatulong higayon na sa grupo nga mopahigayon sa kalihukan apan unang higayon kini nga himoon sa ilang siyudad.

Sumala pa ni Acuña nga 40 ka doktor ug nurse nga gipangulohan ni Dr. Wendell Doroño sa Kansas City ang mopahigayon sa medical, surgical ug dental services alang sa gatusan ka tawo nga buot mopahimulos niini lakip sa libreng tambal.

Ang kagamhanan sa Dakbayan sa Carcar maoy mohatag sa ubang pagkaon, sakyanan, lingkuranan, tulda, security personnel nga mobantay ug uban pa.

Dugang ni Acuña nga ang makanunayon nga suporta sa kagamhanan maoy usa sa hinungdan nga adunay daghang mopahigayon sa ila og medical mission.

Malaumon si Acuña nga matag tuig na unya ang pagpahigayon sa kalihukan aron mas daghan pa ang makabenepisyo niini.

Giklaro sab ni Acuña nga kinahanglan sab  magparehistro sa CPH ang mga tawo nga mopahimulos sa minor ug major operations sa hernia ug myoma.

Si Harold Nacua, city administrator, sa iyang bahin niawhag sa ilang mga konstituwente nga mopahimulos sa libreng serbisyo gikan sa mga langyaw nga espesyalista. Rowena D. Capistrano ug Gabriel C. Bonjoc  (BANAT NEWS)