Pagtukod og coal-fired power plant sa Sawang Calero babagan

CEBU, Philippines -  Gipahibalo ni kanhi konsehal Alvin Dizon nga naghiusa karon sa ilang puwersa kadtong mga environmentalist aron supakon gyud ang pagtukod og duha ka dagkong power plant diha sa Barangay Sawang Calero nga paandaron gamit ang karbon.

Matud ni Dizon nga ang baruganan sa mga environmentalist mao nga ang katukoran sa maong mga coal-fired power plants makadaot gyud sa kalikupan ug ingon man sa panglawas sa katawhan.

Si Konsehal Dave Tumulak miduso og resolusyon sa City Council aron kahisgotan pagbalik ang tinguha sa Ludo & Luym Corporation nga magtukod og duha ka coal-fired power plant sulod sa ilang compound sa Barangay Sawang Calero.

Kining maong lakang gihimo na kaniadtong miaging tuig apan wala kini mahinayon human nga gibasura sa City Council sa maong higayon ang tinguha sa Ludo & Luym atol nga nagsingabot pa ang piniliay.

Ang katawhan nga lumolupyo sa Sawang Calero ug kanait nga mga barangay nabahin-bahin niining maong isyu. Daghan ang misuporta sa pagtukod og power plant kay ang Sugbo magkinahanglan gyud og dugang suplay sa kuryente sa umaabot nga katuigan.

Apan kadtong mga supak mipasabot nga ang katukoran sa coal-fired power plant makadaut sa panglawas sa katawhan ug sa kalikupan kay ang abog nga gikan sa masunog nga karbon, mouban sa aso nga ibuga sa dakong panghaw sa planta.

Apan si Tumulak miingon nga mahimong kalikayan nga dili mobuga og abog ang planta pinaagi sa pagpatuman og higpit nga mga paagi, sama sa gihimo sa mga susama nga planta didto sa Pampanga ingon man sa Taiwan nga migamit gihapon og karbon.

Ang usa sa paagi sa maong mga planta mao ang pagbutang og tubig nga kanunay’ng magsirit sulod sa panghaw aron ang mga aso nga mogawas dili na makadala sa gikahadlokan nga mga abog. Rene U. Borromeo (BANAT NEWS)